Want to create interactive content? It’s easy in Genially!

Captikʷł 2 Story 05

Brandy Baptiste

Created on August 14, 2025

Start designing with a free template

Discover more than 1500 professional designs like these:

Explore all templates

Captikʷł 2

Intermediate Nsəlxcin Stories

by Sʕamtíc̓aʔ (Sarah Peterson) with LaRae Wiley and Christopher Parkin

05

iʔ kəkiʔláw̓naʔ naʔł iʔ tətw̓it 1

q̓sápiʔ iʔ nəx̌ʷnx̌ʷiw̓s ksqʷsiʔəl̓x. łə sƛ̓x̌aps way̓ t̓iʔ my̓may̓t lut l̓ stim̓ t̓ x̌ast. iʔ nəx̌ʷnx̌ʷiw̓s miyáł stw̓tw̓il̓t. ilíʔ kiʔ ƛ̓x̌ap, nax̌m̓ł ny̓ʕay̓p x̌ʷupt.

iʔ sqilxʷ čʔum̓stsəl̓x səxʷn̓t̓aqʷm̓ áłiʔ ʔatxímn̓. yʕayʕát swit wy̓wy̓čin̓əl̓x uł k̓aw̓spíx̌m̓əl̓x uł ixíʔ n̓t̓aqʷs iʔ sk̓am̓qsts iʔ tl̓ n̓ʔałʔíłn̓tn̓səl̓x.

t̓sxʷuy̓s čk̓łłəq̓ʷut l̓ aʔ čc̓l̓c̓al̓ əc̓itx. iwáʔ iʔ ƛ̓əx̌əx̌ƛ̓x̌aps iʔ tətw̓it čún̓maʔn̓tm̓ łə kspix̌m̓s uł k̓ʷul̓xtsəl̓x iʔ tətw̓it t kłčkʷin̓ks uł c̓q̓iln̓s. lut tq̓aʔíl̓smn̓tm̓. t̓iʔ ʔačkníkstm̓s iʔ čkʷin̓ks.

uł k̓ʷín̓maʔs iʔ ƛ̓əx̌əx̌ƛ̓x̌aps ksx̌ʷil̓stsəl̓x iʔ sqʷsiʔsəl̓x. čutəl̓x, "ʕapnáʔ k̓laxʷ łə ʔitx nínwiʔs kʷu ʔim̓x k̓a lkʷut. aláʔ łəwin̓tm̓." k̓laxʷ uł ʔatxílxəl̓x.

n̓paʔqčín̓ uł xʷt̓lilx iʔ ƛəx̌əx̌ƛ̓x̌aps. yʕayʕát suxʷəxʷəl̓x.

si···č qiłt iʔ tətw̓it uł t̓iʔ xʷuk̓ʷəl̓x. ixíʔ sc̓qʷaqʷs. ʔasl̓ásq̓t sc̓qʷaqʷs. k̓ik̓m̓ ksq̓mil̓tn̓s.

kaʔłásq̓t sknánaqsts ixíʔ slkʷil̓xs tl̓ sn̓pul̓xtn̓s. ʔay̓xáxaʔ uł kəčniw̓səs iʔ kiʔláw̓naʔ, iʔ tum̓tm̓ naʔł kəkiʔláw̓naʔ. n̓stil̓s iʔ tətw̓it, "way̓ ilíʔ way̓ kʷuʔ pul̓stsəl̓x. kʷaʔ x̌l̓ stim̓ ikstxʷl̓xʷl̓tmínm̓." ixíʔ kiʔ t̓k̓ʷn̓čut l̓ sxʷuy̓tn̓s iʔ kiʔláw̓naʔ. nax̌m̓ł iʔ kiʔláw̓naʔ kmaʔmn̓čút.

łt̓k̓ʷn̓čut l̓ sxʷuy̓tn̓s iʔ kiʔláw̓naʔ. t̓iʔ ilíʔ kičn̓tm̓ t kəkiʔláw̓naʔ. n̓k̓ʷłʔičknm̓s uł lut t̓ x̌n̓um̓stm̓. "iʔ tum̓tm̓ kʷuʔ čtxʷuym̓s miʔ kʷuʔ kʷn̓nus", n̓stil̓s iʔ tətw̓it. uł t̓iʔ ilíʔ t̓k̓ʷmn̓čut.

ixíʔ čxʷuy̓ iʔ sm̓x̌ikn̓. čun̓tm̓, "lkʷil̓xmn̓t ixíʔ iʔ q̓y̓axʷ. ixíʔ t sk̓asts uł x̌ʷil̓stm̓ t ƛəx̌əx̌ƛ̓aps. ʕ̓ac̓n̓t iʔ sqʷn̓qʷan̓ts !" iʔ tətw̓it k̓ʷłxmis čqʷaʔqʷʔál̓ iʔ kiʔláw̓naʔ t n̓qʷl̓qʷil̓tn̓s. "ixíʔ st̓l̓sqilxʷ x̌min̓ktət kłqáqčaʔtət. k̓ʷul̓mn̓t k̓a mnim̓łtət", čʕačʕáy̓pm̓ iʔ kəkiʔkiʔláw̓naʔ.

"hahúy", čut iʔ sm̓x̌ikn̓, "nax̌m̓ł p xʷuy̓ k̓l̓ saʔtítkʷ miʔ p n̓mulm̓. axáʔ xʷk̓ʷn̓tim̓ iʔ st̓l̓sqilxʷ ixíʔ miʔ k̓ʷul̓n̓tm̓ miʔ kłqáqčaʔm̓p." iʔ kəkiʔkiʔláw̓naʔ n̓mulm̓əl̓x iʔ l̓ yám̓x̌ʷaʔ.

iʔ tum̓tm̓səl̓x kʷis iʔ q̓ʷx̌ʷqin̓kstn̓s uł k̓t̓liw̓səs iʔ tətw̓it t k̓łk̓mípaʔsts uł iʔ k̓l̓ st̓pin̓ks. p̓t̓mʕas iʔ sqʷəqʷłəmusts, n̓qʷic̓n̓k t yʕayʕát t stim̓ t sn̓ʔiłn̓tn̓.

łə n̓xʷk̓ʷíłc̓aʔs iʔ tətw̓it, sm̓x̌ikn̓ wiks iʔ q̓ʷəq̓ʷc̓wíyaʔ iʔ l̓ sqʷl̓čnin̓ks. axáʔ nak̓ʷm̓ iʔ tətw̓it iʔ sumíxs. áłiʔ łə sk̓ʷək̓ʷyúmaʔs uł sx̌ʷúx̌ʷaʔpts. sm̓x̌ikn̓ c̓iws q̓ʷəq̓ʷc̓wíyaʔ sumíx uł łn̓t̓k̓ʷíłc̓aʔs iʔ l̓ tətw̓it.

min̓łtm̓ iʔ snik̓ək̓s t kl̓kil̓xs uł p̓ʔax̌. ʕapnáʔ uł swy̓num̓tx uł kəkʔálaʔqʷ. čut sm̓x̌ikn̓, "xʷuy̓x kxan̓t iʔ kəkiʔkiʔláw̓naʔ".