La bandiere dal Friûl

La leç regjonâl dai 27 di Novembar dal 2001, n. 27, de Regjon Autonome Friûl-Vignesie Julie e fevele di“un drap di forme retangolâr cun al centri une acuile eraldiche di aur cu lis alis spleadis, cjâf a çampe, bec viert e sgrifis rossis, suntun cjamp celest".

La divignince de bandiere e rimonte ae ete dal Stât patriarcjâl di Aquilee, clamât ancje Patrie dal Friûl o Stât patriarcjâl furlan, che dal 1077 al 1420 al à guviernât tant che stât sovran, vassal dal Sacri Roman Imperi, il Friûl e in moments alternis ancje altris teritoris (come la Istrie, il Cjadovri, la Carinzie, il Cragn e la Stirie).

L’esemplâr plui antîc de bandiere patriarcjâl al è in mostre tal Domo di Udin. La bandiere e jere part dal furniment funerari dal patriarcje Beltram di Saint Geniès, restât su la catidre di Aquilee dal 1334 al 1350 e copât in maniere barbare di une conzure di nobii furlans.

Il simbul de acuile al caraterizave il Stât patriarcjâl furlan za prin dal patriarcje Beltram. Lu confermin i reperts numismatics che a incuadrin la adozion de acuile patriarcjâl tal principi dal 1200, cuant che al regnave il patriarcje Volgher.

La bandiere dal Friûl no va confondude cun chê de istituzion aministrative “Regjon Autonome Friûl-Vignesie Julie”, stant che ancje chê e mostre une acuile, si ben che intune posizion diferente. La bandiere regjonâl e à une divignince tant plui resinte (1963) e dut un altri significât. Le acuile e rapresente Rome che rive a judâ Aquilee, rapresentade de tôr che si viôt sot lis catis de bestie.