Mate Balota

Mate Balota - Mijo Mirković

"Putnik zmež grada i sela"

"Lipa ljubav je prez riči, slatka ljubav je prez griha."

Zbilja pretočena u poeziju

Književna djela

Izbor iz poezije

Biografija

Koza

Pramaliće

Jena ljubav

Koza

Mate Balota

"Četȉri ȗre je mȁti hodȉla, pedesȇt miljãri korãki je učinȉla nȁ tašte."

Poticaj za razumijevanje

Izvedbe

Koza

Motivi

Četiri ure je mati hodila, pedeset miljari koraki je učinila na tašte. Tako je došla priko brigi i drag k meni u grad i donila glas da je koza krepala. Doma leži starica baba, i mala sestra je bona. Hiža prez žita, prez muke, prez šolda i krepana koza. Jopet miljari koraki. Svaki je korak pun škrbi. Ma kako se moru tolike duše prihraniti od plaće jenega diteta u gradu. Tri dane nis hrane pokusija tri noći za kozon sam plaka i dela u ognju četrnajst ur na dan. Ma daleki cesar austrijski i veliki car od Jermanije nisu ni slutiti mogli ča misli jedan mali čovik, ki cilu božju noć proplače za kozon.

Koza

Mate Balota

Pramaliće

Mate Balota

"Ȏj, kako je lȋpo, tȁmo u ȉstarskoj drȁgi, pramalȋće."

Poticaj za razumijevanje

Izvedbe

Pramaliće

Motivi

Oj pramaliće, kako je lipo, kad počne nicati cviće, kad počne pupati grabar, jasen i drinak, a šparoge niču iz stine. Koruna se zgusne, arija lipo zadaje, nebo je modro i svitlo, vitar mek i tepa. Kako je lipo kad počnu se štrkati ovce, kad mrtve strane ožive od pisme pastirske, kad vrganj zaore brazdu i prospe se zemlja crljena, prhka, mokra i tepla pokrije plodno sime. Zvona veselije zvone, kanti veselije poju, sve ča je teško je lagnje, nade su jače od tuge. Delo će spuniti dane, noći vreda prolaze. Trdi žuljavi dlani govore, da život je dobar. Ribari s pipon u zubi već pletu mriže. Barke su jopet u moru, ćapi ribe će dojti u dragu, kroki stegnuti rebra, more osoliti lice, kašete menul i škombar nažuljiti rame. Oj, kako je lipo, tamo u istarskoj dragi, pramaliće.

Pramaliće

Mate Balota

Jena ljubav

Mate Balota

"Nȁša ljȕbav je bĩla prez glȃsa"

Poticaj za razumijevanje

Izvedbe

Jena ljubav

Motivi

Jena ljubav

Vajk san u strahu bija, kad san ti blizu prolazija. Prazne su brente skakale na tvojen tovaru, roče su roštale po trdoj sedlenici u uskoj ulici, zmež gustih korun. Nikad se nismo u oči pogledali i samoga Boga smo vreda si nazvali, pak zajno se minuli. Kraljevski se klatilo s tobon tvoje sukneno krilo, ruke su ti igrale držeći pletilo. Jutro za jutron smo tako se stajali, prija suncaistoka, ti si po vodu na vrutak hodila, a ja san dohaža iz boka. Vesla san drža u rukah svu noć i sad san pod ribon sprignut, budi prez straha, neću ja oči gori podignut, i nećeš od mene čuti druge beside, nego jutarnji pozdrav. Nikad ti nisan zapiva pod tvojin balkunon, cviće i facolić mi mlada nisi slala, i znaka da znaš za me ti mi nisi dala. Nikad se mi nećemo pokriti s jenin lancunon. Naša ljubav je bila prez glasa, kako puti u zoru, kako tvoje delo u vrtlih i moje muke na moru. Pofiho sama se gasila, u spomenu stala je tiha, lipa ljubav je prez riči, slatka ljubav je prez griha.

Mate Balota